THISEN

‘Isua pawhin ama thisen ngeia mite chu a tihthianghlim theih na turin ...’(Heb-13:12)

Helai changthu kan han hmuh hian thlaraulamah thisen pawimawhna kan hre awm e. Vawinni-ah erawh chuan Lal Isua thisen niloin keimahni thisen ngei hi a hlutna, mite tan damna a nihna i han sawi dawn teh ang. Kan thisen avangin mite nunna kan chhanhimthei bakah midang thisen hi tupawhin kan la mamawh loang tih tuman kan sawithei lo. Hetiang a nih avang hian, tumahin mipangaichin chuan midangte hnen a thisen pek hi kan ngaihthah theilo ang. Thisen mamawhtute hnena thisen pek hi Kristiante chuan kan batte zing a mi nive ngeiin a lang, midangte tan malsawmna nih hi kan tihtur a ni.

Awle, thisen inpek chungchang hriat ang ang han tarlang dawn ila. Mizoram hi thisenpekah India ramah hian a che pawl chu nilo mah ila, a thapawl kan ni lo a ni tih hi i hre hmasa phawt ila. Mi kum 18-60 mi leh 45kg chin hian thisen hi pethei a ngaih a ni a. Thisen hi 2°C - 6°C a vawnthatin ni 35 a dam thei a. Hetia thisen anhan lak hian 1 unit ah 350ml lak chhuah a ni a. Taksa 1 kg ah hian thisen 70ml awm ang a ngaih a ni a, kan mamawh tawk chu 50ml a ni a, 20ml chu extra a ni(45kg chuan 900ml extra an nei a.1unit=350ml). Chuvang chuan, mipangai chuan kan mamawh tawk aia tam kan nei tihna a ni. Mipangai chuan thisen kan pek hian a hnu thlathum hnuah a pek leh theih nghal a. Thisenpek hi mahni tan pawh a hrisel zawl e an ti, resarch an neihna pakhatah chuan mipa aiin hmeichhia hi an damrei zawk e an ti, heihi a chhan chu thlatin a thi an neih thin vang a ni e an ti a ni. Chuvang chun thisen thar rawn insiam hi kan hriselna atan a lotha zawk a ni, engmah hlauhawm a awm love tih a ni.

Tunlai Mizoram boruakah chun kan damdawiin te hian thisen an mamawh tam hunlai a lo ni chho leh tan ta a. April - Sept thla inkar hi mamawh tamlai a ni. Hemi hunah hian atam thei angber pek theuh i tum ang u. A lan dan chuan Lunglei Civil Hospital-ah hian nitin thisen unit 10 vel pekchhuah a ni a. April thla report-ah kha chuan unit 16 chauh an nei a, hei hian ni 2 pawh a daih lo ang a ni. Chungvang chuan, midangte nuna chhan nan, a mamawh te apiang tan thisen hi pek a ngai tak meuh meuh a ni. Pawl ang a kan pe theilo a nih pawn engtik lai pawhin mimal in a pek theih reng a ni tih lo hria ila. Dt.11.April.08 khan circuit houseah AVBD buatsaih in ‘Advocacy Meeting on Blood Donation’ hman a ni a. Lunglei khawchhung atangin Kohhran Thalai pawl hrang hrang 32 vel kohkhawm a ni a. Hetah hian Rotation a thisen pek dan tur duan chhin a ni a. Kan Bial pawhin Bial khawmpuia a lo rel tawh angin pe turin kan inbuatsaihve a. Rotation a a lan dan chuan Aug thla-ah kan lang a, mahse a aia hma pawhin kan pe maithei bawk. Hetiangte a nih avang hian, tun atang hian peve ngei turin rilru ilo siam ila, a pe tam ber member pawh nih i tum ang u.

Kan Lalpa hian kan nunna a tan ama thisen ngei ralraih khawpin kan tan minpe a. A hnung kan zuive dawn a ni chuan, keimahni ngei pawh hian kan thisen hi midangte tan kan hlanve tur a ni dawn lawm ni. Kan tan chhiatna aiin hriselna a lo ni zawk dawn bawksi nen. chumi khami veng, branch in thisen an pe tih tarlan zingah kan langve ngei tur a ni. A langve ngailo mi kan loni a nih chuan, peve thei thosi in kan pek loh chuan, kan zui Lal Isuaa hnung hi kan zui zolo hle a ni mai lo maw? Awle kan pek ve hun a lo thlengve dawn hnai tawh bawk a, midangte nunna chhanhim turin kan thisen peve theuh turin member tin leh Kohhran mitin te kan ngen tak meuh meuh che u a ni. ‘Thiltha tih tur hria a tisilo chu a tan sual a ni’ tih hi i hre reng a ng u.